Autore: Adea Mustafaj
U arrestua ditë më parë.
E të mërkurën, Gjykata Themelore në Prishtinë i caktoi masën e paraburgimit prej një muaji të dyshuarit Dragan Naskoviq nën dyshimin për krime lufte.
Naskoviq, shtetas i Serbisë, akuzohet se si komandant i nënstacionit policor në Zhegër të Gjilanit, nuk kishte ndërmarrë asnjë veprim për të parandaluar vrasjen e 13 anëtarëve të familjes Hyseni dhe Shabani, në shtëpinë e familjes Hyseni në prill të vitit 1999.
Këtij lajmi iu gëzuan familja Shabani.
Nehat Shabani kujton momentin kur e detyruan të ndahej nga familja tij.
“Një pjesë u ndajtëm familje ashtu edhe lufta na bëri që të ndahemi. Ata mbeten në shtëpi gjyshi me xhaxhin tim. Ai kishte gruan, vajzën edhe një djalë aty, kurse dy djemtë e mëdhenjë ishin me neve që na dëbun më 13 prill. Edhe atë moment, më 13 prill i thirrin edhe i marrin edhe familjen Hyseni i bëjnë bashkë te familja Shabani e gjyshit tim, Riftat Shabani. Edhe aty më pas i grumbullojnë 19 vetë”, shprehet Nehat Shabani
Shabani tregon se atë ditë, kryersit e veprës kishin lënë një të gjallë me arsyetimin që ai të tregonte për krimin e kryer.
“…I ka vra një e nga një, jo refall menjëherë, ajo është tmerri i tmerrit që e bëjnë veç barbarët. Një e kanë lënë të gjallë I kanë thënë ty po të lëmë të gjallë me tregu çka kemi bo”, tregon ai.
Pavarësisht se ka mirëpritur vendimin e Gjykatës, Shabani thotë se edhe sikur fajtorët të marrin burgim të përjetshëm, për ta nuk është e mjaftueshme.
“..ky për neve gjithë qytetarët që kemi pësuar që kemi humbur më të dashurit tonë është një lajm i mirë. Që do të thotë që ai person apo ata persona që e kanë bo atë masakër do të dalin një ditë para drejtësisë dhe sado kudo për neve kjo do të jetë një lehtësim. Edhe sikur të dënohet ku me ditë me sa vite apo me burgim të përjetshëm, përsëri për neve nuk është e mjaftushme”, thotw ai.
Masakra e Llashticës ka ndodhur më 30 prill të vitit 1999, ku ishin pushkatuar e djegur 13 shqiptarë.
I dyshuari me inicialet Dragan Naskoviq u arrestua më 15 shtator në pikëkalimin kufitar Dheu i Bardhë, në kufi me Serbinë.
