Fotografitë e Hashim Thaçit dhe Kadri Veselit ishin vendosur në jelekët e disa prej protestuesve.
Ndërsa fotografitë e katërshes së UÇK-së valëviteshin lart në flamujt që mbushën sheshin në Prishtinë.
Në protestë morën pjesë qytetarë të moshave të ndryshme.
Gra, fëmijë e të moshuar u bënë bashkë në kërkesën për lirimin e ish-krerëve të UÇK-së.
Në mesin e protestuesve nuk munguan as përfaqësuesit politikë.
Deputetët e PDK-së, Blerta Deliu-Kodra e Artan Behrami thanë se presin që më 16 shtator të ketë një vendim për lirimin e Hashim Thaçit dhe të tjerëve.
Për lirimin e tyre foli edhe qytetari Hajdar Sutaj.
Ai tha se katërshja e UÇK-së po mbahet padrejtësisht në Hagë dhe se pret që së shpejti të kthehen në Kosovë.
Këtë pritje e shprehën edhe shumë qytetarë të tjerë.
Në protestë kishte edhe qytetarë nga diaspora, vetëm për t’iu bashkuar kësaj thirrjeje.
Protesta në Prishtinë zgjati rreth një orë e gjysmë.
