Që më shumë se 23 vite, Elhame Bislimi punon për mirëmbajtjen e Kuvendit të Kosovës.
Por për detyrat që kryen ajo merr një pagë prej 275 euro.
Kjo shumë, me të cilën paguhet për pastrimin e hapësirës së institucionit legjislativ nuk është e mjaftueshme.
“Me 275 euro është shumë vështirë me jetu e me mbajt një familje, kurrë rritje nuk kemi pas,ka 20 euro herë 15, shërbimet i bëjmë qysh është më se miri. Ne e kemi sa një mëditje e deputetëve”, tha punëtorja në Kuvendin e Kosovës, Elhame Bislimi.
Njëjtë sikurse Bislimi, edhe Hanife Hyseni nuk është e kënaqur me pagën të cilën e merr për pastrimin e zyrave të deputetëve, e hapësirave tjera të Kuvendit.
“Po mos me pas të ardhura edhe tjetër kah, besoj as bukë thatë nuk del le më tjetër gjë. Por unë me qet pagë po punoj për kompani jo për veti, se mu në fund të muajit nuk po me jetë asgjë. Neve edhe 1 mijë euro me na dhanë i marrim, por me na dhanë 402 euro njëjtë sikurse atyre në fakultete”, tha një tjetër punëtore – Hanife Hyseni.
Për këtë arsye, të martën këta punëtorë teknik organizuan edhe protestë para Kuvendit të Kosovës.
“Ne punojnë që 20 vite këtu. Ne nuk po kërkojmë asgjë me shumë vetëm aq sa na takon neve me ligj. Neve operatori ekonomik nuk na është përgjigjur, nuk mundemi me punua më me 275 euro kur kemi me udhëtua dhe për ushqim nuk po na mjaftojnë. Paguhemi që 6 vjet me këtë pagë dhe na u ka rritë paga vetëm dy herë nga 20 euro, dy herë për tetë vite”, tha përfaqësuesja e punëtorëve teknikë, Nazife Krasniqi.
Për këtë kryetari i Sindikatës së Punëtorëve Privat thotë se fajtor është kompania e cila sipas Jusuf Azemit, çdo muaj merr nga buxheti i shtetit 18 mijë euro.
“Shuma të cilën ia përcjellë kompanisë është 18 mijë euro, shuma të cilën e marrin punotret është 6 mijë euro që do të thotë 3 herë më shumë merr pronari i kompanisë sipas llogaritjes që ne e kemi bërë”, tha Azemi.
Nëse deri në javën e ardhshme nuk do të plotësohen kërkesat, këta punëtorë kanë paralajmëruar bojkot të punës.
