Kosova dhe Serbia, kanë miratuar udhërrëfyesin për zbatimin e marrëveshjeve të energjisë.
Palët patën nënshkruar një marrëveshje për çështjen e energjisë qysh në shtator të vitit 2013. Më pas në muajin gusht të vitit 2015 marrëveshja e parë ishte konfirmuar, po ashtu në Bruksel.
Këto dy marrëveshje, që nga kjo e martë, kanë edhe Udhërrëfyesin e zbatimit të nënshkruar nga delegacionet e Kosovës dhe Serbisë.
Ish-kryeministri i Kosovës, Isa Mustafa, për tëvë1, ka thënë se ky dokument është i ngjashëm me atë të viti 2015, që e nënshkroi sa ishte në krye të ekzekutivit.
“Në esencë po implementohet marrëveshja e vitit 2015, siç shihet edhe në preambulë të dokumentit. Të vetmet risi janë te caktimi i datave për veprimet për implementim”, tha Mustafa.
Ehat Miftaraj nga Instituti i Kosovës për Drejtësi, thotë se kjo marrëveshje është e mirë, pasi kompania Serbe që do të licencohet, do të veprojë nën direktivat e Republikës së Kosovës.
“Kjo kompani ka të drejtë të blej edhe në tregun e përbashkët do të thotë të energjisë elektrike që mund të jetë edhe jashtë Republikës së Kosovës. Sidoqoftë në parim mund të themi që është një marrëveshje e mirë, e cila edhe pjesën e energjetikës njëfarë mënyre e inkuadron apo e shtrin sovranitetin edhe në pjesën Veriore të Republikës së Kosovës, sepse e njëjta në bazë të marrëveshjes së vitit 2013, por edhe në bazë të këtij udhërrëfyesi që sot u nënshkrua do të operojnë nënë autoritetin e Institucioneve të Republikës së Kosovës”, tha Mustafa
Gjatë viteve 2013 e 2015 Lëvizja Vetëvendosje ishte partia opozitare që në vazhdimësi e kishte kritikuar marrëveshjen për energjinë, por tani ka një qasje disi tjetër. Për këtë gjë ka dhënë një shpjegim shefja e grupit parlamentar Mimoza Kusari, në emisionin ResPublika në tëvë1.
…Mu bë pyetje nga gazetarët, thanë që ju keni qenë dikur kundër marrëveshjeve, ndërsa pse tash po i vazhdoni. E para që kontinuiteti i procesit është i pashmangshëm në qeveri dhe e dyta që në sistemi apo në sektorin e energjisë kanë ndodhur disa ndryshime dhe lëvizje tepër të rëndësishme për Kosovën në pavarësimin e sistemit elektro-energjetik, në bashkimin e Kosovës me Shqipërinë në një sistem rregullativ përmes operatorëve të sistemit të transmisionit dhe në anëtarësimin e Kosovës në rrjetin evropian….”, tha Kusari-Lila.
Arritja e kësaj marrëveshje ishte paralajmëruar nga zyrtarët e Bashkimit Evropian, qysh javën e kaluar.
Raporti i gazetarit Valmir Gallopeni.
