Ambasadori i Shteteve të Bashkuara të Amerikës në Prishtinë, Jeff Hovenier dhe kryeministri i Kosovës, Albin Kurti kanë nënshkruar një marrëveshje lidhur me masat e sigurisë për mbrojtjen e informacioneve të klasifikuara.
Hoveneir ka thënë se një marrëveshje e tillë hap dyert për ndarjen e mëtejshme të informacioneve në mes të dy Qeverive.
“Kënaqësi për nënshkrimin e Marrëveshjes SHBA-Kosovë në lidhje me Masat e Sigurisë për Mbrojtjen e Informacionit të Klasifikuar. Kjo marrëveshje, që është duke u bërë prej kohësh, hap derën për shkëmbimin e mëtejshëm të informacionit ndërmjet qeverive tona”, ka shkruar Hovenier.
Ai e ka cilësuar si moment historik të raporteve në mes të SHBA-së dhe Kosovës, nënshkrimin e një marrëveshje të tillë, duke thënë se një marrëveshje e tillë krijon një bazë për ndarjen e informacionit të klasifikuar.
“Në botën e ndërlidhur të shekullit të 21-të, aftësia e partnerëve për të ndarë informacionin shpejt dhe pa probleme është jetike për vendimmarrjen në kohë dhe të informuar. Kjo është veçanërisht e vërtetë në fushat e sigurisë dhe mbrojtjes”, ka deklaruar Hovenier.
“Finalizimi i kësaj marrëveshjeje është i rëndësishëm jo vetëm sepse është kulmi i më shumë se dy viteve të koordinimit dhe negociatave, por gjithashtu përfaqëson përkushtimin e fortë të Shteteve të Bashkuara për bashkëpunim të vazhdueshëm të sigurisë me Kosovën. Përmes kësaj marrëveshjeje, Shtetet e Bashkuara dhe Kosova kanë marrë përsipër detyrimet për të mbrojtur informacionet e klasifikuara të njëra-tjetrës, duke hapur derën për ndarjen e këtyre informacioneve”, ka sqaruar ambasadori amerikan.
Hovenier gjithashtu ka treguar edhe për përfitimet që do të ketë Kosova nga një marrëveshje e tillë me SHBA-në.
“Marrëveshja avancon aftësinë e Kosovës për të mbrojtur sovranitetin dhe integritetin e saj territorial përmes shkëmbimit të informacionit me Shtetet e Bashkuara. Ne mbetemi të palëkundur në përkushtimin tonë ndaj sovranitetit të Kosovës. Kjo marrëveshje gjithashtu promovon qëllimin tonë të përbashkët për të zhvilluar me sukses Forcën e Sigurisë së Kosovës në një forcë mbrojtëse territoriale, multietnike, të operueshme nga NATO. Ajo mbështet drejtpërdrejt synimin tonë të përbashkët për integrimin e plotë të Kosovës në strukturat e sigurisë euroatlantike”, ka theksuar ambasadori i SHBA-së.
“Është një qasje e të gjithë qeverisë, e cila do të forcojë kundër-terrorizmin dhe bashkëpunimin rajonal midis dy vendeve tona.Kjo marrëveshje është veçanërisht e përshtatshme në kontekstin më të gjerë të luftës brutale të vazhdueshme të agresionit të Putinit kundër Ukrainës.Shkurtimisht, kjo marrëveshje pasqyron përkushtimin tonë ndaj qëllimeve të përbashkëta, vlerave të përbashkëta dhe një të ardhmeje më të sigurt për të dy vendet tona.Dhe, ai hap rrugën për marrëveshjet e ardhshme të shkëmbimit të informacionit dhe komunikimit”, ka sqaruar Hovenier.
