Marrëveshja ushtarake Kosovë, Shqipëri dhe Kroaci, po vlerësohet e nevojshme.
Sidomos në kohën e ndryshimeve gjeopolitike, por edhe brishtësisë së sigurisë në rajon.
Eksperti i sigurisë në Shqipëri, Fatjon Softa, këtë marrëveshje trelaterale e sheh pozitive në një kohë siç thotë ai, kritike për vendet e Ballkanit Perëndimor.
“Është gjëja e duhur në kohën e duhur që po bëhet. Ne jemi në një moment shumë kritik, shumë të rëndësishëm ku ka ndryshime globale dhe këto ndryshime globale mund të favorizojnë por mund të mos favorizojnë edhe faktorin shqiptar. Në këtë kuptim, vendet mike siç është Kroacia, Shqipëria patjetër edhe Kosova, bëhen bashkë sidomos për sisteme të sigurisë, sistemet e mbrojtjes kombëtare, sistemet e hapësirës së stabiliteti ballkanik, këtu mendoj se ka ardhë koha të zgjohen faktorët shqiptar”, tha Softa.
Ashtu siç e parasheh edhe deklarata e aleancës së përbashkët ushtarake, se Kosova do të ndihmohet të bëhet pjesë e kartës veri-atlantike, analisti politik, Ben Andoni theksoi për Tëvë1 se Kosova po punon shumë në këtë drejtim.
“E para shikoj rrjedhimin logjik të aleancave që janë në Ballkan, duke që Shqipëria, Kroacia dhe Kosova është boshti i cili ndihmon njëra-tjetrën dhe unë po mendoj që është pragu për Kosovën për tu futur në kartën e Adriatikut. Ju e dini që Kosova duhet të kaloi te karta e Adriatikut për tu anëtarësuar në NATO dhe Kosova po punon shumë e para për anëtarësim në NATO por e dyta për t’i dalë përballë çdo problematike në Ballkan”, Andoni.
Andoni shtoi se bashkëpunimi me Kroacinë, po bëhet në shumë fusha, përfshirë të armatimit por edhe ballafaqimit në rast nevoje me Serbinë.
“Në anën tjetër, Kroacia që e përballë Serbinë qoftë në armatim qoftë në investime po e gjen këtë lloj investimi të marrëveshjes me Shqipërinë dhe Kosovën për të mbajtur realisht larg Serbinë nga problematikat që sjellë”, tha ai.
Kosova, Shqipëria dhe Kroacia nënshkruan deklaratën e përbashkët në fushën e mbrojtjes, duke rritur kështu kapacitetet ushtarake por edhe siç është thënë në tekstin e marrëveshjes, ruajtjen e paqes dhe sigurinë në rajon, ballafaqimin me sulmet hibride por edhe në rast se cenohet siguria e vendit.
