Maroku ka marrë vendim për heqjen e vizave ndaj qytetarëve të Shqipërisë.
Lajmin e ka bërë të ditur Ministri për Europën dhe Punët e Jashtme, Igli Hasani, i cili po qëndron për një vizitë në Marok.
Ai është pritur nga homologu, Nasser Bourita.
Gjatë diskutimeve, dy ministrat vlerësuan marrëdhëniet shumë të mira mes Shqipërisë dhe Marokut dhe riafirmuan angazhimin për të forcuar bashkëpunimin ekonomik, tregtar dhe kulturor.
Ministrat ranë dakord për hapa konkretë në drejtim të bashkëpunimit ekonomik dhe sektorial, përmes promovimit të marrëveshjeve në energjinë e rinovueshme, turizmin dhe sigurinë ushqimore.
Anë këtë kuadër, u nënshkrua një Memorandum Mirëkuptimi (MoU) midis akademive diplomatike të të dy vendeve, për të forcuar bashkëpunimin në trajnimin dhe zhvillimin e kapaciteteve të diplomatëve të ardhshëm.
Në një hap të rëndësishëm për lehtësimin e lëvizshmërisë, rritjen e shkëmbimeve tregtare dhe turizmit, Maroku njoftoi heqjen e vizave për qytetarët shqiptarë për qëndrime afatshkurtra. Ky vendim do të lehtësojë kontaktet mes qytetarëve dhe do të përmirësojë lidhjet ndërmjet dy vendeve.
Gjithashtu, Ministri i Jashtëm i Marokut konfirmoi se do të vizitojë Tiranën përpara fundit të vitit, duke riafirmuar angazhimin për forcimin e marrëdhënieve dypalëshe.
