Gjykata franceze ka dënuar të hënën politikanen, Marine Le Pen për përvetësim dhe e ka ndaluar që të kërkojë poste publike për pesë vitet e ardhshme.
Ajo dhe 24 zyrtarë të tjerë të partisë u akuzuan se kishin përdorur para të destinuara për ndihmësit e parlamentit të Bashkimit Evropian për të paguar në vend të kësaj stafin që punonte për partinë midis 2004 dhe 2016, duke shkelur rregulloret e bllokut 27-vendesh.
Gjyqtarja dha vendime fajësie për tetë anëtarë të tjerë aktualë ose ish-anëtarë të partisë së saj, të cilët, si Le Pen, kanë shërbyer më parë si ligjvënës të Parlamentit Evropian. Gjithashtu u dënuan 12 persona që shërbenin si ndihmës parlamentar dhe tre të tjerë. Vetëm një i pandehur u shpall i pafajshëm.
Le Pen e dënoi vendimin për të cilin tha se është “politik” dhe ka për synim ta pengojë që të kandidojë në zgjedhjet presidenciale të 2027.
“Nëse ky nuk është një vendim politik, nuk e di se çfarë është”, tha ajo në intervistën për TF1.
Ajo e përshkroi vendimin si shkelje të sundimit të ligjit, tha se do të apelonte dhe kërkoi që procedurat gjyqësore të zhvillohen përpara fushatës së 2027-ës. Ajo do të mbetej e papërshtatshme për të qenë kandidate derisa të vendoset apeli.
Le Pen gjithashtu u dënua me katër vjet burgim, ku dy prej tyre duhet t’i vuajë në arrest shtëpiak dhe dy të pezulluar – gjë që nuk do të zbatohej në pritje të apelit, raporton AP.
Reagime kanë ardhur pas vendimit. Kryeministri i Hungarisë, Viktor Orbán, u shfaq shpejt në rrjetet sociale për të shprehur mbështetjen e tij, duke postuar “Je suis Marine!” – Unë jam Marine – në X.
Edhe kundërshtarë politikë të Le Pen shprehën shqetësim, ndër ta ishte ligjvënësi konservator Laurent Wauquiez, i cili tha se vendimi vendosi “një peshë shumë të rëndë mbi demokracinë tonë”.
