Autoritetet franceze kanë bërë të ditur se marina franceze ka sekuestruar gati 10 ton kokainë, me vlerë 610 milionë dollarë në brigjet e Afrikës Perëndimore.
Dy anije detare franceze që vepronin si pjesë e Operacionit Corymbe kapën një sasi të madhe kokaine nga një anije peshkimi pa flamur të hënën, duke vepruar në bazë të një informacioni nga inteligjenca detare, autoritetet antidrogë dhe Agjencia Kombëtare Britanike e Krimit.
Misioni detar Corymbe është vendosur nga Franca në Gjirin e Guinesë që nga viti 1990 për të garantuar sigurinë në një zonë ku pirateria është mjaft e zakonshme.
“9.6 ton kokainë janë kapur nga dy anije franceze”, tha marina franceze, ka bërë të ditur BBC.
Prefektura Detare e Atlantikut e Francës tha se “bashkëpunimi i përsosur nga aktorët kombëtarë dhe ndërkombëtarë” në luftën kundër narkotikëve kishte çuar në “kapjen e jashtëzakonshme” të 9.6 ton kokainë.
Gjiri i Guinesë, pranë bregut perëndimor të Afrikës, ka parë disa kapje droge në muajt e fundit, me rajonin që është një pikë kyçe tranziti në trafikun global të narkotikëve, në veçanti të kokainës nga Amerika e Jugut që dërgohet në Evropë.
