Disa shtylla elektrike në një lagje në fshatin Marec të Prishtinës nuk janë në gjendje të rregullt. Banorët thonë se po u rrezikohet jeta, andaj kërkojnë një intervenim sa më i shpejt. E nga Kompania Kosovare e Distribuimit të Energjisë u premtua se së shpejti do të ndërhyjnë në atë pjesë.
Në këtë gjendje janë këto shtylla elektrike në njërën nga lagjet e fshatit Marec të Prishtinës. Këto shtylla rrezikojnë edhe jetën e njerëzve.
Madje, sipas banorëve, për shkak të kontaktit të kabllove elektrike me drunj, ata shpesh nuk arrin të furnizohen me energji të qëndrueshme.
Fatbardh Makolli, që e ka këtë shtëpi në Marec thotë se për ta evituar rrezikun për jetë, ka ndërhyrë vetë te këto shtylla elektrike.
Madje, ai tregon vështirësitë që kanë hasur si pasojë e mungesës së krijimit të kushteve nga KEDS.
Për këtë çështje, televizioni ka kontaktuar edhe me Kompaninë Kosovare të Distribuimit të Energjisë.
Nga kjo e fundit, përmes një përgjigjeje me shkrim u premtua se do të ndërhyjnë së shpejti në këtë zonë.
“Në atë zonë është trashëguar një rrjet shpërndarës elektrik në gjendje jo të mirë. KEDS ka investuar në daljen e Grashticës dhe të Keqekollës, si dhe në mirëmbajtje preventive. Ju informojmë se ekipet e KEDS-it do të dalin në terren për të verifikuar gjendjen e shtyllave në fshatin Marec të Prishtinës dhe, varësisht nga vlerësimi, do të intervenohet në rastet që paraqesin rrezik”, thuhet në përgjigjen e KEDS.
Kjo pjesë e kryeqytetit po konsiderohet si potencial për zhvillimin e turizmit, andaj banorët prapa kamerave thanë se mosinvestimi në infrastrukturë po zbeh dëshirën për t’u kthyer atje.
Autor: Lindrit Zejnullahu
