Maqedonia e Veriut do ta mbyllë ciklin eliminatorë të Evropianit 2024 sonte në prani të mbi 30 mijë spektatorëve, ku në Shkup do të përballet me favoritin e madh, Anglinë.
Pas humbjes në Romë nga Italia, përfaqësuesja e udhëhequr nga seleksionuesi Bllagoja Milevski do të luajë sonte kundër kryesuesit të grupit, ku do të pretendojë të bëj një paraqitje të mirë në praninë e shikuesve vendit.
“Kemi luajtur një lojë vërtet të vështirë me Anglinë në Old Trafford. Rezultati nuk ishte real duke pasur parasysh cilësinë tonë, por ky është futbolli, gjëra të tilla ndodhin”, ka thënë portieri Stole Dimitrievski para duelit me Anglinë.
“Ne mësuam shumë nga ajo ndeshje, nesër kemi një sfidë të re në të cilën duhet të tregojmë dhe të dëshmojmë se nuk ishte ajo pasqyra e duhur për ne”.
Dueli ndërmjet Maqedonisë së Veriut dhe Anglisë do të luhet sonte nga ora 20:45 në stadiumin “Todor Proeski” i cili do të jetë i mbushur me spektatorë, ku është shitur i gjithë kapaciteti.
Kujtojmë se te Anglia në këtë ndeshje do të ketë mungesë lojtarë të rëndësishëm si Bellingham e Maddison, teksa Maqedonia do të jetë e kompletuar.
