Ministri i Mbrojtjes, Ejup Maqedonci, ka vizituar Komandën e Doktrinës dhe Stërvitjes në kazermën e FSK-së “Skënderbeu” në Ferizaj, ku kanë filluar trajnimin bazik rekrutët e rinj.
Maqedonci është pritur nga komandanti i KDS-së, Gjeneralbrigade, Jeton Dreshaj, ku e ka njoftuar për mbarëvajtjen e gjithë procesit të rekrutimit, të stërvitjeve dhe trajnimeve që janë duke u zhvilluar.
“Aktualisht në disiplina të ndryshme kemi mbi 500 ushtarakë të cilët janë duke u përgatitur. Vetëm në trajnimin bazë kemi 363 rekrutë në kuadër të procesit të rekrutimit të 612 ushtarëve të rinj.
Ministria e Mbrojtjes është e vendosur fuqishëm në ndërtimin e kapaciteteve tona ushtarake, si në rritjen e numrit të personelit ashtu edhe në edukimin, trajnimin, shkollimin dhe pajisjen me armatim modern sipas standardeve të NATO-s” theksoi Ministri Maqedonci, thuhet në njoftim./teve1.info/
