Ministri i Mbrojtjes së Kosovës, Ejup Maqedonci, është takuar sot me znj. Burcu San, Zëvendës-Ndihmëse e Sekretarit të Përgjithshëm të NATO-s për Operacione. Takimi u fokusua në sigurinë rajonale, bashkëpunimin me NATO-n dhe përpjekjet e Kosovës për anëtarësim në aleancë.
Përmes një postimi në Facebook, ministri Maqedonci tha se gjatë këtij takimi është diskutuar për një sërë çështjesh që ndërlidhen me sfidat dhe arritjet e Kosovës në fushën e mbrojtjes, përmes bashkëpunimit me Ekipin Këshillues dhe Ndërlidhës të NATO-s.
“Kisha kënaqësinë që sot të takoj znj. Burcu San me të cilën diskutuam për tema të shumta që ndërlidhen me sigurinë, sfidat, arritjet dhe bashkëpunimin e Kosovës me NATO-n,” ka shkruar Maqedonci.
Ministri theksoi se Republika e Kosovës e ka të qartë orientimin e saj euroatlantik dhe është e përkushtuar që Forca e Sigurisë së Kosovës të zhvillohet sipas standardeve të NATO-s, jo vetëm në aspektin e armatimit, por edhe në edukimin e kuadrove ushtarake profesionale.
“Republika e Kosovës synon të bëhet pjesë e aleancës së madhe të NATO-s dhe bazuar në standardet e kësaj aleance jemi duke vazhduar zhvillimin e FSK-së,” theksoi ministri.
Ai vuri në pah edhe angazhimin ndërkombëtar të FSK-së, duke përmendur pjesëmarrjen në misionin britanik Interflex dhe në Koalicionin për Deminim në ndihmë të forcave ukrainase, si dëshmi e kapaciteteve të saj në përballje me sfidat moderne të sigurisë.
“Pjesëmarrja e ushtrisë tonë në misionin Interflex me Mbretërinë e Bashkuar dhe Koalicionin e Deminimit është tregues i orientimit tonë drejt politikave demokratike Euro-Atlantike, por edhe i kapaciteteve tona të krahasueshme me ushtritë e tjera,” tha Maqedonci.
Takimi me zyrtaren e NATO-s vjen në një kohë kur Kosova po kërkon të forcojë pozicionin e saj ndërkombëtar në fushën e sigurisë dhe të avancojë drejt anëtarësimit në organizatat euroatlantike.
