Ministri i Mbrojtjes i Kosovës, Ejup Maqedonci, ka zhvilluar një takim me Ministrin e Mbrojtjes Kombëtare të Turqisë, Yaşar Güler, si dhe me pesë oficerë nga Kosova që kanë përfunduar shkollimin ushtarak në Turqi.
Në fokus të takimit ishte bashkëpunimi ndërmjet Kosovës dhe Turqisë në fushën e mbrojtjes dhe edukimit ushtarak, me theks të veçantë në zhvillimin profesional të pjesëtarëve të Forcës së Sigurisë së Kosovës.
Maqedonci ka uruar nëntogerët Ramadan Rexha, Gjergj Dreni, Altin Salihaj, Elmë Ramadani dhe Admirim Ismajli për përfundimin me sukses të pesë viteve të shkollimit.
Sipas tij, programi i tyre përfshinte një vit kurs përgatitor të gjuhës turke dhe katër vite studime ushtarake.
“Pata kënaqësinë të takoj kadetët nga Kosova që përfunduan me sukses shkollimin e tyre në këtë akademi prestigjioze”, ka shkruar Maqedonci.
Ministri ka theksuar se përveç zhvillimit të kapaciteteve dhe modernizimit të FSK-së, Ministria e Mbrojtjes i kushton rëndësi të veçantë arsimimit dhe zhvillimit profesional të personelit.
“Investimi në kuadro të mirëfillta ushtarake është investim në të ardhmen e FSK-së dhe në ndërtimin e një force moderne, profesionale dhe të ndërveprueshme me ushtritë e vendeve partnere”, ka deklaruar ai.
Maqedonci ka vlerësuar se shkollimi i oficerëve kosovarë në akademitë ushtarake të vendeve partnere kontribuon në forcimin e lidhjeve dhe bashkëpunimit ndërmjet forcave të armatosura.
Ai ka shprehur mirënjohje ndaj Turqisë për mbështetjen e vazhdueshme në arsimimin dhe zhvillimin profesional të pjesëtarëve të FSK-së.
Në përfundim, Maqedonci u ka uruar pesë oficerëve të sapodiplomuar sukses në detyrat dhe përgjegjësitë e tyre të ardhshme në shërbim të FSK-së dhe Republikës së Kosovës.
