Ministri i Mbrojtjes i Kosovës, Ejup Maqedonci, gjatë vizitës së tij zyrtare në Republikën Federale të Gjermanisë, ka zhvilluar një takim me Drejtorin Menaxhues të Shoqatës Federale të Industrisë së Sigurisë dhe Mbrojtjes së Gjermanisë, Roland Haag.
Përmes një postimi në Facebook, Maqedonci bëri të ditur se gjatë takimit është diskutuar për mundësitë e thellimit të bashkëpunimit ndërmjet Kosovës dhe Gjermanisë në fushën e sigurisë dhe mbrojtjes.
Ai ka theksuar se fokusi kryesor ishte në forcimin e partneriteteve në industrinë e mbrojtjes, zhvillimin teknologjik si dhe ngritjen e kapaciteteve profesionale.
Ministri gjithashtu ka nënvizuar lehtësirat që ofron Qeveria e Kosovës për investime, duke përmendur potencialin e zonave industriale dhe fuqinë punëtore të re, të kualifikuar dhe energjike si një avantazh të rëndësishëm për bashkëpunim ekonomik dhe industrial.
Sipas tij, ky bashkëpunim përbën një hap të rëndësishëm drejt forcimit të lidhjeve strategjike dhe eksplorimit të mundësive konkrete për partneritete afatgjata, në funksion të paqes dhe stabilitetit rajonal.
“Republika e Kosovës mbetet e përkushtuar në thellimin e partneriteteve me aleatët tanë dhe në ndërtimin e një sektori modern dhe të ndërveprueshëm të mbrojtjes”, ka theksuar Maqedonci në fund të postimit./teve1.info/
