Ministri në detyrë i Mbrojtjes, Ejup Maqedonci, ka mirëpritur Raportin e Kongresit mbi Politikën e Shteteve të Bashkuara për Promovimin e Stabilitetit Rajonal dhe Prosperitetit në Ballkanin Perëndimor, duke vlerësuar se ai riafirmon mbështetjen e vazhdueshme të SHBA-së për zhvillimin dhe transformimin e Forcës së Sigurisë së Kosovës.
Sipas Maqedoncit, raporti konfirmon përkrahjen amerikane për shndërrimin e FSK-së në një forcë moderne, profesionale dhe multietnike të mbrojtjes territoriale, në përputhje me standardet euro-atlantike.
Ai theksoi se ky vlerësim paraqet dëshmi të progresit të arritur nga Kosova në forcimin e kapaciteteve mbrojtëse dhe partneritetit të ngushtë me SHBA-në dhe aleatët ndërkombëtarë.
“Përkrahja amerikane ka qenë dhe mbetet vendimtare në rrugëtimin tonë drejt ndërtimit të një force të aftë për mbrojtjen e sovranitetit, integritetit territorial dhe sigurisë së qytetarëve tanë”, ka deklaruar Maqedonci.
Ministri i Mbrojtjes vlerësoi gjithashtu njohjen e rolit të Kosovës si kontribuuese në sigurinë ndërkombëtare, duke theksuar angazhimin e vendit në përpjekjet shumëkombëshe për ruajtjen e paqes dhe stabilitetit.
Sipas tij, Kosova po dëshmohet si partner i besueshëm dhe kontribuues aktiv në sigurinë rajonale dhe globale, duke reflektuar transformimin nga konsumues sigurie në ofrues të saj.
Maqedonci tha se Republika e Kosovës do të vazhdojë investimet në zhvillimin e kapaciteteve mbrojtëse, forcimin e bashkëpunimit me aleatët strategjikë dhe në avancimin e aspiratës të palëkundur për integrim të plotë euro-atlantik./teve1.info/
