Ministri në detyrë i Mbrojtjes, Ejup Maqedonci, ka njoftuar se të martën ka marrë pjesë në Panairin e Industrisë së Mbrojtjes në Stamboll.
Sipas tij, në hapje të panairit përveç figurave të larta shtetërore të Turqisë, prezent kanë qenë edhe ministra të mbrojtjes të shteteve anëtare të NATO-s dhe vendeve partnere.
Maqedonci e ka vlerësuar Panairin e Industrisë së Mbrojtjes në Stamboll, si mundësi për avancim të kapaciteteve të mbrojtjes.
“Ky panair paraqet ngjarje të rëndësishme për avancimin e lidhjeve dhe bashkëpunimit në fushën e mbrojtjes. Ky panair ofron një platformë të shkëlqyer për të diskutuar avancimin e kapaciteteve logjistike dhe luftarake, si dhe për të identifikuar mundësi të reja për investim dhe bashkëpunim. Qëllimi ynë afatgjatë mbetet forcimi i sigurisë dhe mbrojtjes kombëtare përmes investimeve strategjike dhe zhvillimit të infrastrukturës së nevojshme. Pjesëmarrja në këtë panair është një hap i rëndësishëm drejt përmirësimit të kapaciteteve tona dhe sigurimin e njohurive dhe teknologjisë më të avancuar për ushtrinë e Kosovës. Ne jemi të përkushtuar për të ndërtuar një të ardhme më të sigurt për vendin tonë”, ka shkruar ai në Facebook.
Ai, po ashtu ka bërë të ditur se gjatë ditës ka takuar përfaqësues të kompanive prodhuese të pajisjeve ushtarake, me qëllim të intensifikimit të marrëdhënieve dhe eksplorimit të mundësive për furnizimin e ushtrisë së Kosovës.
