Lidhur me rastin tragjik të mbytjes së mërgimtarit Rrahim Latifi, në liqenin e Ujmanit, është paralajmëruar se serbët kanë hedhur tela elektrikë në Ujman.
Për këtë ka reaguar në një komunikatë për media, Policia e Kosovës dhe Prokuroria Themelore e Mitrovicës të cilët kanë thënë se këta tela nuk janë të lidhur me energji elektrike dhe nuk paraqesin rrezik.
Ministri në detyrë i Mbrojtjes, Ejup Maqedonci në një intervistë në emisionin “Mesditë” në Tëvë1 ka deklaruar se policia po merret me këtë informacion se a është i saktë apo jo.
Derisa, ai ka shtuar se situata për gjetjen e trupit të pajetë është menaxhuar në formë të mirë nga trupat e FSK-së.
Ndërsa, sa i përket manipulimeve të fotove të FSK-së, ai ka shtuar se kjo ka qenë jo e drejtë.
“Unë vlerësoj që veprimi i duhur pikërisht është duke u bërë tani, pra në momentin që kemi ndonjë sinjalizim të çfarëdo lloji, Policia e Kosovës ka me të vërtetë kapacitete profesionale të nevojshme për të vlerësuar dhe siguruar që ai informacion është i saktë apo jo. Vlerësoj që për çdo sinjalizim policia bënë këto veprime, nuk shoh që në këtë situatë është shqetësim çështja e kësaj informacioni për faktin që do të bëhet një vlerësim i gjetjes nga policia dhe do të merren masat e duhura. Janë të gjitha palët që qysh në mëngjes kanë tentuar në njëfarë forme të politizojnë edhe pse unë nuk shoh, politizim shpërndarjen e informacioneve. Situata është menaxhuar në formë të mirë nga trupat e FSK-së të cilat në mënyrë shumë profesionale kanë kryer detyrën e tyre, kurse sa i përket manipulimeve të fotografive që është theksuar, që unë mendoj që është problematika kryesore ku me të vërtetë kanë qenë jo të drejta dhe kanë qenë në një moment që nuk është dashtë të theksohen”, ka deklaruar ai./teve1.info/
