Ministri në detyrë i Mbrojtjes, Ejup Maqedonci, ka marrë pjesë në Ditën e Vizitorëve të Shquar (DV Day), në kuadër të stërvitjes ndërkombëtare “Combat Power 26”, e zhvilluar në poligonin ushtarak të Slunjit në Kroaci, me ftesë të zëvendëskryeministrit dhe ministrit kroat të Mbrojtjes, Ivan Anušić.
Përmes një postimi, Maqedonci bëri të ditur se në këtë stërvitje morën pjesë mbi 3 mijë ushtarakë nga Kroacia dhe vende aleate e partnere, ndërsa Kosova u përfaqësua nga një kontingjent prej 45 pjesëtarësh të Forcës së Sigurisë së Kosovës (FSK).
“Jam veçanërisht krenar që Republika e Kosovës u përfaqësua denjësisht nga kontingjenti i Forcës së Sigurisë së Kosovës, i përbërë nga 45 ushtarakë, të organizuar në një tog luftarak të këmbësorisë dhe elementë të mbështetjes logjistike”, ka shkruar Maqedonci.
Sipas tij, pjesëtarët e FSK-së dëshmuan profesionalizëm, disiplinë dhe përkushtim gjatë gjithë stërvitjes, duke konfirmuar aftësinë për të operuar së bashku me ushtritë aleate dhe partnere.
“Pjesëtarët tanë dëshmuan profesionalizëm, disiplinë dhe përkushtim të lartë, duke konfirmuar se Forca e Sigurisë së Kosovës zotëron aftësitë dhe kapacitetet për të vepruar me sukses krah për krah me ushtritë aleate dhe partnere”, theksoi ai.
Ministri në detyrë tha se stërvitja, e cila zgjati 11 ditë, përfshiu operacione të integruara ajrore dhe tokësore në kushte sfiduese, me qëllim rritjen e ndërveprueshmërisë dhe përgatitjes së forcave pjesëmarrëse.
Ai veçoi edhe avancimin e FSK-së në aspektin logjistik, duke theksuar se tashmë Forca e Sigurisë së Kosovës ka ndërtuar kapacitete të plota organike për shërbimet e ushqimit, të cilat, sipas tij, mund të mbështesin jo vetëm pjesëtarët e saj, por edhe forcat partnere gjatë stërvitjeve dhe operacioneve të përbashkëta.
Në fund, Maqedonci vlerësoi se pjesëmarrja në stërvitje të tilla është dëshmi e forcimit të kapaciteteve mbrojtëse të Kosovës dhe e rolit të saj si partnere e besueshme në fushën e sigurisë.
“Pjesëmarrja në një stërvitje si ‘Combat Power 26’ nuk është vetëm një angazhim ushtarak. Ajo është dëshmi se Kosova po ecën përpara, po forcon kapacitetet e saj mbrojtëse dhe po bëhet çdo ditë e më e gatshme për t’u përballur me sfidat e sigurisë”, përfundoi Maqedonci.
