Ministri në detyrë i Mbrojtjes, Ejup Maqedonci, ka bërë të ditur se forcimi i kapaciteteve profesionale të Forcës së Sigurisë së Kosovës në fushën e operacioneve paqeruajtëse mbetet një nga prioritetet kryesore të Ministrisë së Mbrojtjes.
Përmes një postimi në Facebook, Maqedonci njoftoi se majori Driton Haxhiaj ka përfunduar me sukses Kursin e Komandantit të Kontingjentit të Operacioneve Paqeruajtëse, të organizuar nga Qendra Japoneze për Trajnim dhe Kërkim për Operacionet Paqeruajtëse të Kombeve të Bashkuara, në Tokio të Japonisë.
“Forcimi i kapaciteteve profesionale të FSK-së në fushën e operacioneve paqeruajtëse është një nga prioritetet e Ministrisë së Mbrojtjes”, ka shkruar Maqedonci.
Ai vlerësoi se përfundimi me sukses i këtij trajnimi përbën një hap të rëndësishëm në ngritjen profesionale të kuadrove të FSK-së dhe në përgatitjen e tyre për angazhime ndërkombëtare.
“Major Driton Haxhiaj ka përfunduar me sukses Kursin e Komandantit të Kontingjentit të Operacioneve Paqeruajtëse, të organizuar nga Qendra Japoneze për Trajnim dhe Kërkim për Operacionet Paqeruajtëse të Kombeve të Bashkuara, në Tokio, Japoni”, theksoi ai.
Sipas Maqedoncit, njohuritë dhe përvoja e fituar gjatë këtij kursi do të kontribuojnë në zhvillimin e mëtejshëm të lidershipit dhe përgatitjes profesionale të personelit të FSK-së.
“Ky trajnim kontribuon në zhvillimin e mëtejshëm të lidershipit dhe përgatitjes profesionale të kuadrit të FSK-së për angazhime në operacione ndërkombëtare të paqes”, ka përfunduar Maqedonci.
