Ministri në detyrë i Mbrojtjes, Ejup Maqedonci, ka zhvilluar sot një takim me përfaqësuesit e Organizatës së Veteranëve Amerikanë të Luftërave të Huaja (VFW), përfshirë Carol Whitmore, Komandante Nacionale e VFW-së, dhe Ryan Gallucci, Drejtor Ekzekutiv i Zyrës së Uashingtonit të kësaj organizate.
Gjatë takimit, Maqedonci theksoi lidhjet e forta ndërmjet Kosovës dhe Shteteve të Bashkuara të Amerikës, të ndërtuara mbi vlera të përbashkëta, sakrificë dhe partneritet strategjik.
Ai shprehu mirënjohje të veçantë për shërbimin dhe kontributin e veteranëve amerikanë në Kosovë, si dhe për mbështetjen e tyre të vazhdueshme ndaj vendit.
“Shpreha mirënjohjen time të thellë për shërbimin e tyre në Kosovë dhe për mbështetjen e vazhdueshme të veteranëve amerikanë ndaj Kosovës”, ka shkruar Maqedonci në një postim në Facebook.
Takimi kishte për qëllim forcimin e bashkëpunimit ndërmjet palëve dhe riafirmimin e mbështetjes së SHBA-së ndaj forcave të sigurisë dhe veteranëve të Kosovës.
