Bashkëpunimi trepalësh mes Kosovës, Shqipërisë dhe Kroacisë po merr formë konkrete, duke përfshirë angazhime të drejtpërdrejta të forcave ushtarake të këtyre shteteve.
Ky bashkëpunim ka si fokus rritjen e ndërveprueshmërisë, zhvillimin e kapaciteteve ushtarake dhe avancimin e bashkëpunimit në përputhje me standardet euroatlantike.
Ministri i Mbrojtjes në detyrë, Ejup Maqedonci, theksoi se ky bashkëpunim i fuqishëm është një hap i rëndësishëm drejt avancimit të sigurisë dhe stabilitetit rajonal.
Një hap i rëndësishëm në këtë proces është takimi trilateral i zhvilluar mes Gjeneral-Lejtënant Bashkim Jasharit, Komandant i Forcës së Sigurisë së Kosovës, Gjeneral-Lejtënant Arben Kingjit, Shef i Shtabit të Përgjithshëm të Forcave të Armatosura të Shqipërisë, dhe Gjeneral Tihomir Kundid, Shef i Shtabit të Forcave të Armatosura të Kroacisë. Ky takim nënvizon angazhimin për forcimin e bashkëpunimit rajonal në fushën e sigurisë dhe mbrojtjes.
Deklarata e përbashkët e mbrojtjes, e nënshkruar në nivel ministrash më 18 mars 2025, po konkretizohet me angazhime të reja si në aspektin e politikave të mbrojtjes ashtu edhe në bashkëpunimin ushtarak.
