Me ndërmjetësimin e Brukselit janë arritur disa marrëveshje mes Kosovës dhe Serbisë ku kjo e fundit zotohet se nuk do ta pengojë shtetin më të ri në Evropë të sigurojë njohje të reja dhe në procesin e anëtarësimit nëpër organizata ndërkombëtare.
Por, shteti fqinj i shkeli sërish marrëveshjet.
Ministria e Jashtme e Serbisë, reagoi me agresivitet kur e pranoi lajmin se Kenia ka vendosur ta njoh pavarësinë e Kosovës.
Serbia e ka konsideruar një akt armiqësor njohjen e Kosovës nga Kenia, ndërsa ka paralajmëruar se do të ndërmarrë masat e nevojshme diplomatike dhe politike ndaj saj.
Eurodeputeti austriak, Lukas Mandl, thotë se këto lëvizje të Serbisë dëshmojnë se ajo akoma nuk e pranon realitetin për Kosovën.
“Më vjen keq kur shoh deklarata të tilla nga qeveria e Serbisë. Kjo dëshmon edhe njëherë që qeveria serbe nuk e kupton realitetin. Nëse Serbia do të ndryshonte qasje do të përfitonte jashtëzakonisht shumë në aspektin ekonomik duke u bërë motor i Ballkanit Perëndimor. Megjithatë janë për keqardhje qëndrimet agresive të pushtetit në Serbi. Konsideroj se qeveria atje duhet t’i ndryshojë qëndrimet sepse ashtu po kërkojnë edhe qytetarët e shumtë që po protestojnë kundër atij regjimi”, tha ai për Tëvë1.
Megjithatë Mandl u shpreh kritik edhe ndaj Bashkimit Evropian.
Deputeti i Parlamentit Evropian, thotë se BE-ja ka nevojë për reforma dhe se duhet të krijohen rrethana të reja politike për pranimin e shteteve të rajonit të Ballkanit Perëndimor në bllok.
“Shoh se shtetet e Ballkanit Perëndimor kanë vizion për t’u bashkuar me bllokun evropian. Në anën tjetër në BE ka disa sfida në aspektin politik dhe teknik. Shtetet anëtare të unionit evropian duhet t’i bëjnë detyra e shtëpisë për të krijuar traktate të reja që t’i hapet rruga e anëtarësimit të vendeve të Ballkanit Perëndimor. Jemi duke e përjetuar periudhën më të gjatë në histori që kur është anëtarësuar për herë të fundit një shtet në familjen evropiane. Shteti i fundit që bë pjesë e Bashkimit Evropian është Kroacia në vitin 2013”, tha Mandl.
Nga Bashkimi Evropian e kanë bërë të qartë se Kosova dhe Serbia nuk mund të anëtarësohen në BE nëse nuk i normalizojnë plotësisht marrëdhëniet me njëra-tjetrën.
