Eurodeputeti austriak Lukas Mandl tha se lidershipi politik duhet të mbrojë lirinë e shprehjes.
Sipas tij, zëri i qytetarëve duhet të dëgjohet edhe atëherë kur është i qetë apo jo ekstrem.
Kështu u shpreh ai në një diskutim me studentët e Universitetit të Prishtinës, me të cilët foli për integrimin evropian, sfidat dhe perspektivën e Kosovës.
Në Prishtinë, ai theksoi rolin e arsimit, për çka tha se është pjesë thelbësore e së ardhmes.
“Kjo është e ardhmja. Ju jeni e ardhmja. Rinia është e ardhmja. Gjenerata e ardhshme është e ardhmja e Republikës së Kosovës. Rinia që qëndron në Kosovë është parakusht për gjithçka që mund të ndodhë pozitivisht në të ardhmen. Dhe arsimi, reflektimi akademik, inovacioni, dhe gjithçka që lidhet me shkencën dhe fushën akademike është një pjesë e rëndësishme, thelbësore, do të thosha, e së ardhmes. Prandaj ju falënderoj për këtë, për praninë tuaj këtu, dhe për studimet tuaja këtu”, ka thënë ai.
Eurodeputeti Mandl foli edhe për rreziqet për kërcënimet e demokracisë, për çka tha se polarizimi është i dëmshëm.
“Ne e quajmë gjithashtu në diskursin politik, ku mund të çojë në këtë polarizim, mund të çojë në diçka qartësisht të dëmshme. Përçarja është diçka ku një fqinj nuk flet më me tjetrin madje edhe brenda grupeve të ndryshme shoqërore, familjeve, kompanive, fshatrave, lagjeve. Mund të shkaktosh përçarje kur demokracia dëmtohet, kur gjuha e urrejtjes shfaqet nën ombrellën e ashtuquajturës liri e shprehjes”, tha ai.
Gjatë diskutimit me studentët, Mandl theksoi rëndësinë e mbrojtjes së lirisë së shprehjes institucionet.
“Pra, mbrojtja e lirisë së shprehjes është shumë më komplekse nga sa mund të mendohet. Nuk është anarki. Është e drejta për të shprehur veten, edhe nëse zëri yt nuk është ekstrem, por më tepër i arsyeshëm. Edhe nëse zëri yt nuk është i lartë, por më tepër i qetë. Edhe nëse nuk është plotësisht i bindur në vetvete, ndoshta është më reflektues. Ndoshta është edhe pjesë e dialektikës, siç quhet”, deklaroi Mandl.
Teksa foli për demokracinë, ai tha se qytetërimi arrihet atëherë kur mbrohet në tërësi liria e të gjithëve.
“Dhe kjo është arsyeja pse lidershipi, lidershipi politik, nuk ka të bëjë vetëm me shërbimin, por edhe me mbrojtjen e lirisë. Mbrojtjen e lirisë, jo kufizimin e saj, por mbrojtjen e lirisë. Dhe përsëri, ashtu siç folëm për lirinë e shprehjes, është liria e të gjithëve, jo vetëm e më të pasurve, më të fortëve, më të dhunshmëve apo kujtdo tjetër, por liria e të gjithëve. Dhe kur kjo mund të shndërrohet në struktura institucionale, teknike dhe organizative të një shteti apo entiteti demokratik, cilido qoftë ai, atëherë mund të themi se po përmbushim premtimin e qytetërimit tonë”, përfundoi ai.
Deputeti austriak në Parlamentin Evropian, Lukas Mandl ka vizituar edhe Universitetin Publik “Kadri Zeka” Gjilan. Lukas Mandl është politikan austriak nga Partia Popullore Austriake (ÖVP) i cili ka qenë anëtar i Parlamentit Evropian që nga nëntori 2017 dhe u rizgjodh në 2019./kp
