Sulmuesi Rey Manaj ka marrë vendim për të ardhmen e tij.
Ai në afatin kalimtar të janarit do të largohet nga Sivasspori, por jo edhe nga kampionati i Turqisë.
Manaj pritet të jetë përforcimi i parë i skuadrës së Trabzonsporit në vitin 2025, pasi mediumet turke kanë raportuar se palët tashmë kanë arritur marrëveshjen.
Është trajneri i Trabzonsporit, Shenoll Gynesh, ai që ka insistuar për 27-vjeçarin, të cilin po e sheh si përforcim të rëndësishëm për repartin e sulmit.
Thuhet se Trabzonspori është pajtuar t’i paguaj Sivassporit rreth 2 milionë euro për kartonin e Manajt, duke pasur parasysh se futbollisti i Shqipërisë ka kontratë deri në verën e vitit 2025.
Manaj është pjesë e Sivassporit prej vitit 2023 dhe këtë sezon në elitën e futbollit të Turqisë, ka shënuar 4 gola dhe ka bërë 1 asistim në 12 ndeshje të luajtura.
Ai, gjithashtu ka edhe 38 paraqitje dhe 7 gola të shënuar me fanellën e Kombëtares së Shqipërisë.
