Kanadaja dhe Malta njoftuan të mërkurën se do ta njohin shtetin e Palestinës në shtator, duke iu bashkuar Francës dhe Mbretërisë së Bashkuar në rritjen e presionit për t’i dhënë fund konfliktit gati 80-vjeçar izraelito-palestinez.
Sekretari i përhershëm në Ministrinë e Jashtme të Maltës, bëri njoftimin e vendit të tij më parë në mbledhjen e Asamblesë së Përgjithshme të OKB-së mbi një zgjidhje dy-shtetërore për konfliktin, e cila u zgjat për një ditë të tretë për shkak të numrit të madh të vendeve që donin të flisnin.
Cutajar tha se Malta e ka mbështetur prej kohësh vetëvendosjen për popullin palestinez dhe “si aktorë përgjegjës, kemi detyrën të punojmë për ta përkthyer konceptin e një zgjidhjeje me dy shtete nga teoria në praktikë”, raporton AP.
Kryeministri i Maltës, Robert Abela, njoftoi më parë në Facebook vendimin e vendit të tij, një ish-koloni britanike, për të njohur shtetin palestinez, duke thënë se kjo është pjesë e përpjekjeve të vendit “për një paqe të qëndrueshme në Lindjen e Mesme”.
Kombi ishullor mesdhetar dhe anëtar i Bashkimit Evropian do t’u bashkohet më shumë se 145 vendeve, përfshirë mbi një duzinë vendesh evropiane, në njohjen e shtetit të Palestinës.
Izraeli kundërshton një zgjidhje me dy shtete dhe po e bojkoton takimin së bashku me aleatin e tij më të ngushtë, Shtetet e Bashkuara.
