Politologu Albinot Maloku ka vlerësuar se thirrja e seancës së nesërme për miratimin e projektbuxhetit nga Lëvizja Vetëvendosje tregon se kjo parti nuk ka shumicën e nevojshme për të formuar qeverinë e re të Kosovës.
Në emisionin “Këndi i Debatit” në Tëvë1, Maloku ka theksuar se nuk duhet të ndërmerren hapa të tjerë pa u vendosur qeveria e re.
“Vetë thirrja e një seance për të argumentuar se bëhet për çështjen e buxhetit, marrëveshjeve ndërkombëtare dhe Planit të Rritjes, është një tregues i qartë se nuk ka numra për mandatarin Konjufca për të avancuar drejt formimit të qeverisë. Mosprezenca e subjekteve të tjera politike në Kuvend është në përputhje me rendin kushtetues”, ka thënë Maloku.
Ai ka shtuar se praktikat ku rendi kushtetues “provohet në maksimum” dhe pastaj kërkohet ndërhyrja e Gjykatës Kushtetuese për interpretim, janë “lojë e rrezikshme” që mund të dëmtojë stabilitetin e vendit.
Sipas tij, buxheti është një çështje politike, ndërsa formimi i mekanizmave të Kuvendit është një proces juridik dhe kushtetues që duhet të ndodhë para se të ndërmerren hapa të tjerë.
“Pra, nuk mund të bëhet asgjë pa u sqaruar se kush do të marrë qeverinë dhe si do të formohen organet tjera gjegjëse të Kuvendit”, ka përfunduar Maloku.
Ndryshe, Kuvendi i Kosovës do të mbajë nesër (e mërkurë) dy seanca plenare, të thirrura nga grupi parlamentar i Lëvizjes Vetëvendosje, me qëllim që të përshpejtohet procesi i formimit të Qeverisë së re, por edhe çështje kyçe si buxheti dhe miratimi i marrëveshjeve ndërkombëtare./teve1.info/
