Politologu Albinot Maloku, duke komentuar vendimin e Gjykatës Kushtetuese lidhur me nënkryetarin e pestë të Kuvendit të Kosovës nga radhët e komunitetit serb, ka deklaruar se zgjedhja e nënkryetarëve në Kosovë nuk ka qenë asnjëherë problematike, pasi sipas tij, pozita e tyre nuk ka pasur peshë të veçantë politike.
Në emisionin “Këndi i Debatit” në Tëvë1, Maloku ka thënë se nuk e ka njohur dhe nuk e njeh Listën Serbe si parti politike, por vetëm si formacion politik në Republikën e Kosovës.
Ai ka theksuar se shteti i Kosovës dhe qeveritë e deritanishme kanë pasur mundësi që t’i qasen Listës Serbe në një mënyrë tjetër që në fillim, por sipas tij kjo nuk ka ndodhur, pasi ajo është përdorur për konsum të brendshëm politik.
“Kushtetuta e vendit ka sqarimet e veta, të cilat i kemi diskutuar në shumë rrethana, me të mirat dhe të këqijat e saj. Aktvendimet e Gjykatës Kushtetuese janë shtesa në interpretim, ndërsa Kushtetuta mbetet baza. Si pasojë e këtyre sqarimeve, në disa momente në Kosovë ka pasur ndryshim orientimi dhe kahjeje institucionale, ku shembull eklatant është edhe vendimi i sotëm. Unë konsideroj se shumica e një subjekti politik në Kuvendin e Kosovës, që përfaqëson komunitetin serb me 10 deputetë, ka mundësi zgjedhjeje. Togfjalëshi që kam përdorur për Listën Serbe ka qenë ‘formacion politik në Republikën e Kosovës’, pasi as si subjekt nuk e kam njohur. Kryeministri Kurti e njohu së fundmi duke thënë se është subjekt i Republikës së Kosovës. Nënkryetarët e Kuvendit në Kosovë nuk kanë qenë kurrë problem për t’u zgjedhur, pasi pesha e kësaj pozite nuk ka qenë e tillë që të krijojë bllokada. Lista Serbe, në kushte normale, do të duhej që në krye të herës t’i qasej shteti në mënyrë tjetër. Ka pasur mundësi që kjo të bëhej edhe nga qeveria, por nuk është bërë, pasi është përdorur për konsum të brendshëm politik, si dhe për konsum politik edhe nga spektri politik serb në Kosovë”, ka thënë Maloku.
