Në “Info Nata” në Tëvë 1, Maloku theksoi se nuk sheh diçka që Kosova do mund të përfitonte nga katër marrëveshjet e nënshkruara sot mes Shqipërisë, Maqedonisë së Veriut dhe Serbisë.
“Dhe unë nuk po mundem me besu në ato katër marrëveshje, nuk e gjej Kosovën që kishte mundur me përfitu diçka. Po flasim për njohjen e diplomave. Kosova dhe Serbia në procesin e dialogut në Bruskel, prej vitit 2010 e këndej, është fol dhe ka marrëveshje për çështjen e njohjes së diplomave. Serbia nuk është duke e zbatuar atë”, tha ai.
Maloku potencoi se se shpreson që Qeveria e Kosovës nuk do të ndërrojë qëndrimet sa i përket Ballkanit të Hapur.
“Unë Kosovën më shumë e shoh racionale dhe po du me besu dhe shpresu që kursori i Kosovës, konkretisht i Qeverisë së Kosovës nuk do të ndërrojë në raport me Ballkanin e Hapur”, tha ai.
Në Ohër të Maqedonisë së Veriut u mbajt sot samiti për “Ballkanin e Hapur”.
Në kuadër të këtij samiti, Shqipëria, Maqedonia e Veriut dhe Serbia kanë nënshkruar marrëveshje për luftën kundër evazionit fiskal, njohjen e diplomave të arsimit të lartë, bashkëpunimin kulturor dhe bashkëpunimin në fushën e turizmit. /Teve1.info/
