Analisti politik, Albinot Maloku, ka komentuar zhvillimin e fushatës zgjedhore nga subjektet politike, duke vlerësuar se ajo nuk është aq e zbehtë sa mund të duket në publik.
Në emisionin “Këndi i Debatit” në Tëvë1, Maloku tha se aktivitetet e partive politike në terren po zhvillohen në mënyrë të organizuar, por sipas tij, situata në rrjetet sociale paraqitet krejt ndryshe.
“Unë nuk e konsideroj fushatën shumë të zbehtë, sepse në terren po mbahet dhe po zhvillohet në mënyrë të kuruar nga të gjitha subjektet politike. Mirëpo, në terrenin e Facebook-ut kemi një fushatë shumë manipulative”, tha Maloku.
Sipas tij, rrjetet sociale janë mbushur me përmbajtje manipuluese, të cilat po ndikojnë në mënyrën se si qytetarët e perceptojnë fushatën.
“Tash se kush do ta ketë efektin e vet tek qytetari, nuk e di, por rrjetet sociale janë maksimalisht të mbushura me manipulacione, qoftë përmes inteligjencës artificiale, qoftë përmes shpjegimeve që priten ose shkurtohen. Pra, ka një agresion të madh në hapësirën digjitale”, u shpreh ai.
Maloku vlerësoi se përdorimi i përmbajtjeve të manipuluara dhe i teknologjive të reja në rrjetet sociale po e bën fushatën më të ashpër në botën virtuale sesa në aktivitetet që subjektet politike po zhvillojnë në terren.
