Malisheva e ka mposhtur skuadrën e Ballkanit dhe ka bërë hap të madh drejt mbetjes në elitën e futbollit të Kosovës.
Malisheva të mërkurën gjatë ditës triumfoi ndaj Ballkanit me rezultatin, 2:0, në ndeshjen që u zhvillua në stadiumin “Liman Gegaj” në Malishevë dhe i takoi xhiros së 24-t të Superligës së Kosovës.
Ishte disfata e parë për skuadrën e Ballkanit në pranverë. Të dyja golat, Malisheva i shënoi në pjesën e parë.
Mërgim Pefqeli shënoi i pari në minutën e 40-të të ndeshjes, ndërsa në minutën e 44-rt realizoi Arbër Pira.
Labinot Ibrahimi në fundin e ndeshjes pësoi lëndim të rëndë dhe është larguar nga fusha me autoambulancë.
Malisheva ngjitet në vendin e shtatë me 29 pikë, katër më shumë se Dukagjini i vendit të tetë, që gjendet në zonën e barazhit.
Ballkani mbetet lider me 48 pikë. Ka dy pikë më shumë se Gjilani që ka një ndeshje më pak të zhvilluar.
Malisheva në xhiron e ardhshme udhëton te Drenica, kurse Ballkani e pret Feronikelin.
