Ish-drejtori i Policisë së Kosovës, Reshat Maliqi, ka vlerësuar se zvarritja e rasteve të vrasjeve nëpër gjykata ka ndikuar në dështimin e parandalimit të tyre në Kosovë.
Në emisionin “Ditari” në Tëvë1, Maliqi është shprehur se rritja e efikasitetit në institucionet e sundimit dhe zbatimit të ligjit, si Policia, Prokuroria dhe Gjykatat, do të ndikonte në parandalimin e vrasjeve.
Sipas tij, ndërmarrja e masave të shpejta dhe efikase, si dhe shqiptimi i dënimeve të merituara ndaj personave që ushtrojnë dhunë ose nxisin konflikte, do të kishte efekt parandalues.
“Zvarritja e rasteve të vrasjeve nëpër gjykata besoj se ndikon që qytetarët të marrin vendime dhe t’i zgjidhin problemet në mënyrë vetanake. Duhet të rritet efikasiteti në institucionet e sundimit dhe zbatimit të ligjit, si Policia, Prokuroria dhe Gjykatat. Ndërmarrja e masave të shpejta dhe efikase, si dhe shqiptimi i dënimeve të merituara ndaj personave që ushtrojnë dhunë apo nxisin konflikte të tilla, me siguri do t’i parandalonte vrasjet”, ka deklaruar Maliqi.
Ndryshe, një 32-vjeçar dyshohet se është vrarë me armë zjarri të dielën rreth orës 22 e 50 në një banesë në Ferizaj.
Prokuroria Themelore në Ferizaj ka njoftuar se për rastin është ndaluar një vajzë.
Gjithashtu thuhet se është ndaluar edhe babai i saj, siç thuhet deri në sqarimin e plotë të rrethanave dhe përfshirjes së tij në këtë rast.
Sipas Policisë vajza e dyshuar është A.R. 24,vjeçe, ndërsa babai i saj është M.B. 48-vjeçar.
Policia ka njoftuar se e lënduar në rast është edhe e dyshuara A.R. e cila thuhet se mbetet nën trajtim mjekësor në QKUK.
Ndërkohë, Prokuroria Themelore ka njoftuar se ka kërkuar nga Gjykata Themelore në Ferizaj caktimin e masës se paraburgimit ndaj 24 vjeçares, e dyshuar për vrasjen e të dashurit të saj, 32 vjeçarit.
Ndërsa, babai i saj i cili ishte ndaluar deri në sqarimin e plotë të rrethanave, me vendim të Prokurorit të Shtetit është liruar./teve1.info/
