Ish-drejtori i Policisë së Kosovës, Reshat Maliqi, ka folur lidhur me rastin e vdekjes së 27-vjeçarit Agon Zejnullahu gjatë ndërhyrjes së Policisë në Lipjan, në emisionin “Këndi i Debatit” në Tevë1.
Maliqi theksoi se çdo përdorim force nga zyrtarët policorë, edhe ai minimal, duhet të raportohet zyrtarisht brenda Policisë së Kosovës. Ai përmendi ekzistencën e një komisioni të brendshëm që trajton rastet e përdorimit të forcës, të cilin e ka drejtuar vetë për pesë vjet.
“Zyrtarët policorë, edhe kur përdorin forcën minimale, kanë për detyrë ta raportojnë atë. Ka një komision brenda Policisë që merret me këtë. Vendosja e kamerave është shumë e mirë, sepse ndihmon të kuptohet qartë çfarë ka ndodhur,” u shpreh Maliqi.
Duke komentuar zhvillimet e fundit, ai tha se suspendimi i pesë zyrtarëve policorë është hapi i parë, por vendimet përfundimtare do të varen nga procesi hetimor.
“Hetuesia do të tregojë nëse ka pasur tejkalim të forcës. Ka dëshmitarë dhe prova të tjera që do të ndihmojnë në zbardhjen e rastit. Nëse provohet tejkalimi, atëherë përgjegjësit do të marrin dënimin e merituar, sepse askush nuk është i lejuar të përdorë forcë jashtë ligjit,” tha ai.
Maliqi komentoi edhe mënyrën e ndërhyrjes së policëve në momentin e arrestimit të 27-vjeçarit.
“Forca policore duhet të jetë proporcionale. Në këtë rast nuk mund të them me siguri se është tejkaluar, por nga pamjet duket që pesë policë janë hedhur mbi një person. A ka pasur goditje apo diçka tjetër, do ta vërtetojë raporti i autopsisë,” deklaroi ai.
Në fund, Maliqi shtoi se edhe Policia e Kosovës do të mbështesë hetimin e rastit për të garantuar transparencë dhe drejtësi.
Rasti i vdekjes së Zejnullahut ka nxitur reagime të shumta publike, ndërsa hetimet janë në zhvillim nga Prokuroria, Inspektorati Policor dhe Instituti i Mjekësisë Ligjore.
