Kryetari i Kuvendit, Glauk Konjfuca, ka pritur në takim ambasadorin jorezident të Malajzisë, Zahit Rastam, me të cilin kanë diskutuar për marrëdhëniet mes dy vendeve.
Përmes një njoftimi, bëhet e ditur se Rasam ka theksuar që Malajzia do të jetë mbështetëse e vazhdueshme e Kosovës në të gjitha fushat.
“Kryetari Konjufca falënderoi ambasadorin Rastam për mbështetjen e vazhdueshme që shteti i tij ka dhënë për Kosovën, duke vlerësuar se Malajzia ka qenë njëra ndër vendet që i ka dhënë shumë Kosovës që nga pas lufta, si me prezencën e saj në Kosovë, ashtu edhe në rrafshin ndërkombëtar. Ambasadori Rasam, duke e falënderuar kryetarin Konjufca për pritjen, theksoi se Malajzia do të jetë mbështetëse e vazhdueshme e Kosovës në të gjitha fushat, përfshirë anëtarësimin e saj në institucionet ndërkombëtare”, thuhet në njoftim.
Konjufca dhe Rasam u pajtuan se ka mundësi të zgjerimit dhe begatimit të marrëdhënieve midis dy vendeve, si në fushën parlamentare, ashtu edhe në segmente të tjera me interes të ndërsjellë./teve1.info/.
