Ambasadori i ardhshëm i Shqipërisë në Kosovë, Petrit Malaj, ka thënë se do të angazhohet për të çuar përpara zhvillimet aktuale ndërmjet dy vendeve, e që sipas tij janë në interes të përbashkët të qytetarëve të dy vendeve.
Malaj në një reagim në Facebook, ka thënë se ndihet i nderuar nga detyra që i është dhënë, ndërsa shtoj se raportet Kosovë – Shqipëri domosdoshmërisht janë të natyrës strategjike.
“Në lutjen që i drejtoj Zotit për të qenë të gjithë bashkë triumfues në këtë sfidë profesionale, patriotike, shtetërore e shpirtërore që nuk ka asnjë shans tjetër përveçse të jetë e fituar në emër të gjithë shqiptarëve, i falënderoj për besimin e dhënë. E cilësoj këtë detyrë si të veçantë ndaj nuk do ndalem në asnjë mur apo pengesë që mund të më dalë përpara, për të çuar më tej zhvillimet aktuale, që përkthehen në zhvillim të përbashkët të qytetarëve tanë. Marrëdhëniet dhe bashkëpunimi Shqipëri – Kosovë, domosdoshmërisht janë të natyrës strategjike, me rëndësi të patjetërsueshme dhe me një rol unik për stabilitetin, sigurinë, zhvillimin e qëndrueshëm dhe perspektivën euroatlantike të dy vendeve dhe gjithë rajonit. Suksesi i këtij misioni nuk është i lidhur me asnjë emër individi, por është detyrimi fisnik i çdo shqiptari. Mirë u takofshim në Kosovë”, ka shkruar ai.
Petrit Malaj dekretohet ambasador i ri i Shqipërisë në Kosovë
