Një ngjarje e rëndë ka ndodhur këtë të mërkurë, më 5 nëntor në Francë, ku një shofer ka përplasur me makinë kalimtarë dhe çiklistë në ishullin Oleron, në brigjet e Atlantikut.
Lajmi u konfirmua nga ministri i Brendshëm Laurent Nunez.
Sipas autoriteteve lokale, të paktën dhjetë persona u plagosën, katër prej të cilëve ndodhen në gjendje kritike për jetën.
Të plagosurit janë të moshës nga 22 deri në 67 vjeç dhe disa prej tyre janë transportuar me helikopter në spitalin e Poitiers.
Burri u ndalua nga efektivët e policisë disa minuta pas ngjarjes, ndërsa po përpiqej t’i vinte flakën automjetit të tij.
Në makinën që u dogj pjesërisht, u gjetën bombola gazi.
Në momentin e arrestimit, shoferi, i cili siç shkruan Corriere Della Sera, ishte i njohur në zonë për probleme me drogën dhe alkoolin, thuhet se ka bërtitur “Allahu Akbar”.
I dyshuari është një shtetas francez 35-vjeçar, që jeton i vetëm në një rulo në La Cotinière, një fshat në bregun perëndimor të ishullit.
“Është i njohur për episode të shumta sjelljeje të çrregullt, veçanërisht për shkak të konsumit të rregullt të drogës dhe alkoolit,” tha kryetari i bashkisë së Saint-Pierre-d’Oléron, Christophe Sueur.
Sipas informacioneve të para, burri i arrestuar ka deklaruar se është radikalizuar përmes internetit.
