Të ikur nga lufta, varfëria e dhuna, shumë persona kanë gjetur strehim brenda këtyre mureve.
Në Qendrën e Azilantëve në Magure të Lipjanit, nga fillimi i këtij viti, janë strehuar 45 azilkërkues.
Nga Palestina, Ukraina, Pakistani, e vende të tjera, këta persona po gjejnë rehatinë në Kosovë.
Drejtori i kësaj Qendre, Fitim Zariqi, tregon kushtet që i ofron kjo qendër.
“Përveç strehimit, Qendra për Azil përfshin edhe ushqim tri herë ditë, veshmbathje, pako hixhenike, ofron shërbime social, psikologjike, juridike, kurse dhe trajnim si dhe shërbime të tjera në kuadër të qendrës. Kemi punëtorë, psikolog, mjekë dhe zyrtarë të tjerë të shërbimeve të ndryshme për të ofruar të gjitha ato që janë të parpara me ligj”, tha Zariqi.
Madje azilkërkuesit mund të mësojnë edhe për rrobaqepësinë.
Poashtu kohën e tyre mund të kalojnë edhe në këtë dhomë të ndenjës ku u ofrohen edhe pajisje për zbavitje.
E përveç të rriturve, këtu strehohen edhe një numër i fëmijëve, të cilët kanë mundësi të mësojnë në gjuhën shqipe.
“Organizohen edhe kurse të ndryshme, ndjekin edhe shkollimin por edhe aktivitete të tjera sociale. Kurset e gjuhës shqipe mbahen dy herë në javë, kurset e kompjuterëve mbahen dy herë në javë. Kemi edhe një kurs të rrobaqepësisë, pastaj shkollimi është barabartë me të gjithë fëmijët këtu”, tha sociologu, Ismet Musa.
Por puna me azilkërkues nuk është pa sfida.
“Në kemi disa sfida sa i përket grupeve të ndryshme ose kulturave të ndryshme që kanë problem mes vete dhe ka rast që ka person që janë përdorues të narkotikëve ose janë nën ndikimin e alkoolit dhe shkaktojnë probleme”, tregoi Zariqi.
Azilkërkuesit kanë mundësi që gjatë ditës të lëvizin lirshëm, kurse pas orës 22:00, ata duhet të kthehen në vendstrehimin e tyre.
