Presidenti francez, Emmanuel Macron i ka ngarkuar ministrit të tij të Jashtëm Jean-Noël Barrot të punojë me partnerët evropianë mbi një propozim të negociuar për t’i dhënë fund luftimeve midis Izraelit dhe Iranit, raporton CNN.
Sipas një deklarate nga Pallati Elize, të mërkurën Macron mblodhi këshillin e mbrojtjes dhe sigurisë kombëtare të vendit për të diskutuar situatën në Iran.
Deklarata theksoi shqetësimin e presidentit francez për përshkallëzimet e fundit në konfliktin Izrael-Iran, duke përmendur “sulmet izraelite që synojnë gjithnjë e më shumë objektiva që nuk kanë lidhje me programin bërthamor dhe balistik iranian, si dhe një numër në rritje të viktimave civile në Iran dhe në Izrael”.
“Është e nevojshme t’u jepet urgjentisht fund këtyre operacioneve ushtarake, të cilat mbartin kërcënime të rënda për sigurinë rajonale”, thuhet në deklaratë, duke bërë thirrje për një rikthim në negociatat mbi programin bërthamor të Iranit.
Ministria e Jashtme e Francës është ngarkuar gjithashtu me ndihmën e shtetasve francezë që dëshirojnë të largohen nga Izraeli ose Irani, tha ajo.
