Presidenti i Francës, Emmanuel Macron, theksoi nevojën për unitet politik dhe gjeostrategjik të Evropës, në një kohë me sfida për sigurinë kontinentale.
Ai në Samitin e gjashtë të Komunitetit Politik Evropian në Tiranë, ka potencuar nevojën e forcimit të bashkëpunimit duke hequr barrierat tregtare, raporton KosovaPress.
Në vijim të deklaratave për forcimin e bashkëpunimit kontinental, Macron propozoi krijimin e një sekretariati, që mund të përfshijë edhe Këshillin e Evropës, për të koordinuar më mirë veprimet përballë kërcënimeve nga jashtë dhe për të ruajtur unitetin evropian.
Presidenti francez i kushtoi një pjesë të rëndësishme të fjalës së tij sigurisë ekonomike të Evropës, duke thënë se Evropa përfaqëson një treg më të madh se Shtetet e Bashkuara të Amerikës dhe më ndikues se Kina, por që vuan nga barrierat tregtare.
“Siguria ekonomike, deri më tani nuk kemi kuptuar mjaftueshëm që përfaqësojmë mbi 700 milionë banorë, është një treg shumë më i madh se ai amerikan, shumë më koherent, është edhe më me ndikim se sa tregu kinez. Na duhet të rrisim bashkëpunimin, duke hequr barrierat tregtare. Duhet që Evropa e madhe të jetë më e bashkuar nga pikëpamja tregtare…Duhet bërë më shumë edhe për integrimin rajonal dhe për zgjerimin. Ne do të bashkërenditemi për të luftuar të gjitha kërcënimet nga jashtë, gjithçka që mund të sjellë konkurrencë së pandershme, do të jemi më të fortë po të rrimë së bashku, do të kemi kapacitete për të mbrojtur tregjet tona. Pra, jemi në një pikë në kohë ku duhet t’i dalim për zot situatës. Nuk e di a ka dorë Zeusi, por rreziqet janë të pranishme. Është koha të ngrihet një sekretariat, ndoshta të përfshijë edhe praninë e Këshillin e Evropës dhe kjo do të ishte e dobishme”, tha Macron.
Macron ka bërë thirrje për armëpushim në luftën në Ukrainë, duke thënë se Moska zyrtare duhet ‘iu kthehet diskutimeve për arritjen e paqes.
“Natyrisht, pikë së pari është lufta e agresionit rus në Ukrainë. Volodymyr e di se sa shumë jemi krah tij solidar. Kemi krijuar koalicionin e të vullnetshmeve, dhe është shumë e rëndësishme të mbështetet Ukraina, pikë së pari armëpushimi… Nuk do të këtë armëpushim spontan, Rusia duhet t’u kthehet diskutimeve që u mbajtën në vitin 2022. Natyrisht kjo d.m.th që duhet të këmbëngulin në mënyrë që të sigurohet një paqe e qëndrueshme në Ukrainë”, ka thënë Macron.
Samiti i gjashtë i Komunitetit Politik Evropian po mbahet për herë të parë në Tiranë dhe aty po marrin pjesë mbi 40 liderë.
