“Ma kanë drejtu atë kondakun jam rrëzu jam alivanosë tani ma kanë maltretu djalin e vajzën e mikut”
Janë përjetime nga marsi i vitit 1999.
Të gjitha këto ndodhën në këtë rrugë të Skenderajt, pas një operacioni policor e ushtarak serb.
Në “Lagjen 2” të këtij qyteti, atë ditë u vranë 15 civilë shqiptar.
“Ata kanë qenë të vendosur në këtë pjesën këtu nalt tash nuk po duket këtu, ka qenë borë atë ditë, kanë qenë me tesha të bardha nalt atje dhe kur e kanë marrë masanej komandën e tyre për me i bë këto maltretime ata janë lëshu të gjithë në këtë pjesë zakonisht në këtë pjesën këtu”, ka thënë Haxhiu
E në këtë aksion, dyshohet se mori pjesë edhe ish-pjesëtari i MUP-it serb, Dejan Peleviq.
Ky i fundit u arrestua të martën në fshatin Soqanicë të Leposaviqit, nën dyshimin për krime lufte.
E emri i tij, është i njohur për Munish Haxhiun, i cili i përjetoi tmerret e asaj dite.
“Na kanë largu prej shtëpive, kam ardh në Skenderaj te një mik i imi jemi hy brenda pas një kohe na kanë ardh këta me tesha të bardha që thashë të maskum kanë qenë disa kanë hy brenda na kanë kërkuar para, na kanë kërkuar me tregu psh ku është UÇK-ja, sikur këta që e kanë pas atë traditën e tyre, dhe pare nuk kemi pas fatkeqësisht apo fatbardhësisht me veti atë ditë kështu që na kanë kërkuar me dhunë”, u shpreh tutje Haxhiu.
Pas ngjarjes, trupat e të vrarëve ishin sjellë në vendin e njohur si “Te Pishat”
74-vjeçari tregon se në këtë ditë ishin marrë edhe disa persona nga forcat serbe dhe nuk dihet më për fatin e tyre.
“Prej tyre e njoh shumë mirë e kam pas mik Gani Azemin me dy djemtë e tij që i kanë marrë në shtëpi të e vet atë ditë dhe nuk dihet sot e asaj dite ku janë, janë të zhdukur djemtë e tij i kanë lënë gratë e tyre dhe të dy e kanë nga një djalë”, theksoj Haxhiu.
Pas arrestimit, Dejan Peleviq ndodhet në ndalim policor prej 48-orësh.
Ndërsa sipas policisë, duke vepruar me urdhër dhe në mënyrë të organizuar, ka kontribuar në spastrimin e territorit përmes dëbimit të dhunshëm të civilëve shqiptarë nga pronat e tyre, plaçkitjes dhe djegies së pasurisë, si dhe në ushtrimin e dhunës fizike dhe psikike.
