Lëvizja Vetëvendosje ka konfirmuar pjesëmarrjen në “Marshin për Drejtësi” që do të mbahet të dielën më 2 prill në sheshin “Zahir Pajaziti” në Prishtinë, raporton teve1.info.
Në një njoftim në Facebook, LVV ka shkruar për ish-shefin e Grupit Parlamentar, anëtarin e Kryesisë, Rexhep Selimi, duke thënë se është e sigurt se ai siç ka kryer secilën punë me sukses do të dalë fitimtar edhe në betejën e radhës.
“Rexhep Selimit, ish-shefit të grupit tonë parlamentar, anëtarit të Kryesisë, që së bashku me Lëvizjen ishin kundër themelimit të kësaj gjykate, i është këputur përgjysmë angazhimi i rëndësishëm e kontributi i mirë për vendin. Por, është e sigurt se Rexha ashtu siç ka kryer secilën punë me sukses do të dali fitimtar edhe në betejën e radhës”, thuhet në njoftim.
LVV është treguar bindëse se ish-krerët e UÇK-së do ta tejkalojnë me faqe të bardhë këtë sfidë, duke mbrojtur luftën e drejtë të UÇK-së.
“Ne jemi të bindur se ata do ta tejkalojnë me faqe të bardhë edhe këtë sfidë, duke mbrojtur edhe njëherë luftën e drejtë të UÇK-së dhe popullit të saj nga akuzat e padrejta dhe nga fushatat që synojnë përbaltjen e luftës së shqiptarëve të shtypur”, thuhet tutje në njoftim.
“Marshi për Drejtësi” do të bahet të dielën, në sheshin e Prishtinës, në mbështetje të ish-krerëve të UÇK-së, që po mbahen në Hagë.
