Komisioni Qendror i Zgjedhjeve ka përditësuar rezultatet e zgjedhjeve teksa po vazhdon numërimi i votave të ardhura me postë nga diaspora.
Sipas të dhënave të fundit, Lëvizja Vetëvendosje ka siguruar 53 ulëse në Kuvendin e Kosovës, ndërsa Lidhja Demokratike e Kosovës ka rënë në 18 ulëse. Partia Demokratike e Kosovës vazhdon të mbajë 22 mandate, kurse Aleanca për Ardhmërinë e Kosovës ka 7 ulëse.
Zëdhënësi i KQZ-së, Valmir Elezi, ka njoftuar se deri në fund të ditës do të procedohen për numërim 216 nga gjithsej 223 kuti me vota të diasporës. Shtatë kutitë e mbetura pritet të numërohen gjatë orëve të mëngjesit të së mërkurës, duke përmbyllur kështu procesin e numërimit të votave me postë.
Ndërkohë, paralelisht me votat e diasporës, KQZ-ja do të nisë edhe numërimin e votave me kusht dhe atyre të personave me nevoja të veçanta. Në 52 vendvotime me kusht janë evidentuar gjithsej 8,751 votues.
Procesi zgjedhor po hyn në fazën përfundimtare, ndërsa pritet që rezultatet të qartësohen plotësisht pas numërimit të të gjitha kategorive të votave.
Kliko këtu për rezultatet e plota
