Për aktivitete të tilla Lëvizja Vetëvendosje ishte njohur gjatë kohës sa ishte në opozitë.
Mirëpo këto metoda Vetëvendosje nuk po i ndryshon as gjatë kohës sa po qëndron në pushtet.
Anëtari nga radhët e kësaj partie, Sami Kurteshi, përmes një konference para Prokurorisë Speciale të Kosovës ka treguar në mënyrë kronologjike rastin e aktivistit Astrit Dehari.
Sipas tij nuk ka asnjë dyshim se Dehari është arrestuar i pafajshëm dhe është vrarë në Qendrën e Paraburgimit në Prizren.
“Astrit Dehari është arrestu si i pafajshëm dhe është vrarë në Qendrën e Paraburgimit në Prizren.Rasti arrestimit të aktivistëve të LVV ka përfunduar me aktgjykim të plotfuqishëm më 30 tetor 2023 nga Gjykata e Apelit pas kthimit e rigjykimit. Gjykata e Apelit ka vërtetu që nuk ka asnjë dëshmi të vetme as një fakt të vetëm që i fajëson të arrestuarit dhe thotë aktivistët e LVV-së. Astrit Dehari është arrestu si i pafajshëm dhe është vrarë në Qendrën e Paraburgimit në Prizren më 5 nëntor 2016”, tha Kurteshi.
Në rastin e vdekjes së Deharit, Kurteshi ka implikuar ish-presidentin Hashim Thaçi dhe ish-kryekuvendarin Kadri Veseli.
Sipas tij ish-krerët e shtetit e kanë pranuar se Dehari është vrarë, kurse nuk la pa kritikuar edhe institucionet e tjera të vendit.
“Urdhri ka qenë politik nga maja e shtetit, fatkeqësisht në atë kohë nga presidenti i vendit dhe kryekuvendari që edhe në mjete të informimit kanë pranuar se është vrasje rasti i Deharit dhe ata kanë dhënë urdhër të drejtpërdrejt për veglat e tyre në Prokurori, Gjykatë, AKI e Polici për ta inskenuar rastin”, tha ai.
Tutje, anëtari i Komisionit Qendror të Zgjedhjeve, Sami Kurteshi, thotë se ky rast qëllimisht është duke u zvarritur nga prokuroria.
“Në këtë rast unë dua të deklaroj edhe në emër të Vetëvendosjes strategjia e prokurorisë shtetit të Kosovës është e qartë zvarritje e qëllimshme e rastit, bartje e rastit në kompetencë të prokurorëve parapensionistë që dorëzojnë stafetën e krimit njëri te tjetri”, u shpreh Kurteshi.
Astrit Dehari ka vdekur më 5 nëntor të vitit 2016 teksa po mbahej në Qendrën e Paraburgimit në Prizren, si i dyshuar për sulmin ndaj ndërtesës së Kuvendit, në gusht të vitit 2016.
Gruda: Qeveria e Vetëvendosjes ka dorë në moszbardhjen e rastit Dehari
