Plot tetë muaj pas mbajtjes së zgjedhjeve, është konstituuar Kuvendi i Republikës së Kosovës. Nenad Rashiq, përfaqësues nga komuniteti serb, siguroi 71 vota pro, ndërsa 9 deputetë votuan kundër dhe 23 të tjerë abstenuan.
Pas procesit të votimit, Rashiq u shpreh falënderues ndaj deputetëve për besimin e dhënë.
“Jam shumë falënderues ndaj kolegëve të mi që sot kanë votuar për mua dhe shpresoj që kjo të jetë një fillim i ri në ndërtimin e institucioneve sa më shpejt që të jetë e mundur”, tha Rashiq.
Nënkryetarja e Lidhjes Demokratike të Kosovës, Hykmete Bajrami, tregoi arsyet pse partia e saj vendosi ta mbështesë Rashiqin.
“Ne votuam për Nenad Rashiqin sot sepse aktgjykimi i fundit i Gjykatës Kushtetuese ka dhënë një interpretim që nuk e kishim më parë. Sipas atij interpretimi, ai ka të drejtë të zgjidhet si nënkryetar dhe përfaqësues i komunitetit serb”, tha Bajrami.
Në anën tjetër, kryetari i PDK-së, Memli Krasniqi, shprehu dyshime lidhur me vlefshmërinë e konstituimit.
“Është konstituar apo jo Kuvendi, duket se kjo përgjigje ende nuk e ka marrë formën e plotë. Unë besoj se konstituimi ka qenë i nevojshëm dhe i domosdoshëm më 15 prill, për çka jemi angazhuar ne. Mbetet të shihet a do të funksionojë tutje. Për ne është e rëndësishme që konstituimi të jetë final dhe të hyjmë në afatet kushtetuese për të parë mundësinë e formimit të qeverisë së re”, deklaroi Krasniqi.
Ndërkohë, nënkryetarja e Vetëvendosjes, Albulena Haxhiu, njoftoi se shumë shpejt do të nisin procedurat për propozimin e mandatarit për kryeministër. Ajo përjashtoi çdo mundësi për koalicion me PDK-në dhe Listën Serbe, por theksoi se VV mbetet e hapur për bashkëpunim me parti të tjera.
“Ne do të vazhdojmë komunikimet edhe me deputetët e tjerë, nëse kanë vullnet të jenë pjesë e qeverisë. Mund të ketë deputetë nga grupet parlamentare apo subjektet e tjera politike. Ka pasur përpjekje me LDK-në dhe vullnet për koalicion me Nismën, por ata nuk kanë pasur gatishmëri”, tha Haxhiu.
Ndërkohë, Lista Serbe ka paralajmëruar se do t’i drejtohet përsëri Gjykatës Kushtetuese, duke pretenduar se emërimi i Rashiqit si nënkryetar është bërë në mënyrë të paligjshme.
