Pesë muaj pasi i ndau rrugët me Partinë Demokratike të Kosovës, LDK në kryeqytet e ka gjetur një aleat të ri.
Lidhja Demokratike të hënën ka zyrtarizuar koalicionin me Aleancën për Ardhmërinë e Kosovës.
Sipas marrëveshjes AAK-ja do t’i ketë tri drejtori, atë të Administratës, atë të Sportit si dhe Drejtorinë e Mobiletit, e cila iu shtua së fundmi kryeqytetit.
Nga komuna e Prishtinës, këtë koalicion e kanë quajtur si një ristrukturim me qëllim të rritjes së efikasitetit.
Por skeptik rreth rezultateve është shprehur Lëvizja Vetëvendosje.
“Modeli i qeverisjes që zoti Rama dhe LDK kanë ofruar gjatë këtyre 3 viteve, na bën shumë skeptik dhe dyshues që këto ndryshime të partnereve të koalicionit do t’i sjellin ndonjë ndryshim pozitiv qytetit. Edhe pak e jemi ne vitin e fundit të mandatit të kësaj qeverisje dhe mundësitë për të bërë diçka pozitive janë minimale, për të mos thënë se s’ka fare mundësi”, ka thënë Gëzim Sveçla, shef i grupit të asamblistëve në Prishtinë.
Kurse sipas Partisë Demokratike, ky koalicion është bërë me një qëllim.
“Me vetë faktin që e ka liruar nga detyra drejtorin e urbanizmit, të cilin e ka emëruar në një pozitë të cilën para gjashtë muajve e kishte shuar vetë Përparim Rama, tregon për presionin e madh të interesave të mëdha që ka për të kaluar planin zhvillimor komunal”, ka thënë Leotrim Retkoceri nga PDK.
Kurse sipas njohësit të çështjeve politike, Visar Xani ndërrim i shpeshtë i koalicioneve nuk ka efekte pozitive për qytetarët.
“Është e rëndësishme që koalicionet të jenë të qëndrueshme dhe që dhanë efekt në punën dhe atë punë e dinë qytetarët. Koalicionin me AAK, nuk është ndonjë koalicion i madh, është një koalicion minor, por gjithsesi mund të shtyjë disa projekte për para dhe mund të të llogarit pak më shumë mbështetje në asamble kryetari Përparim Rama”, ka thënë Xani.
Partia Demokratike është larguar nga koalicioni me LDK-në, në shkurt të këtij viti, këtë e kishin bërë pasi në Kuvendin Komunal ishte është votuar për anulimin e vendimit për këmbim të pronave në Badovc.
