Lëvizja Vetëvendosje përmes reagimi ka dhënë qëndrimin e saj lidhur me aktgjykimin e Gjykatës Kushtetuese për seancën konstituive të Kuvendit.
Sipas kësaj partie, në aktgjykim është theksuar qëndrimi i kësaj partie në tri pika.
“Aktgjykimi i sotëm i Gjykatës Kushtetuese thekson qartë atë që e kemi përsëritur dhe kemi insistuar që në fillim të procesit të konstituimit të Kuvendit:1. Obligimi për të përfunduar konstituimin e Kuvendit është obligim i të gjithë deputetëve dhe jo vetëm i subjektit të parë. 2. Zgjedhja e kryetarit dhe ajo e nënkryetarëve janë në nivel të barabartë. 3. Votimi i fshehtë nuk paraqet shkelje të Kushtetutës”, thuhet ndër të tjera në reagimin e LVV-së.
Gjykata Kushtetuese ka konstatuar që vazhdimi i deritashëm i seancës konstituive të Kuvendit nuk është zhvilluar në pajtim me përcaktimet e Kushtetutës dhe se deputetët duhet ta përfundojnë këtë seancë jo më vonë se 30 ditë, në një njoftim që është dërguar për media të enjten pasdite.
