Deputeti i Partisë Demokratike të Kosovës, Mërgim Lushtaku, ka deklaruar se qëndrimi i kësaj partie është i qartë dhe se do të vazhdojë të qëndrojë në opozitë, duke u bazuar në rezultatin e zgjedhjeve.
Ai tha se PDK-ja e ka pranuar rezultatin zgjedhor dhe se ky qëndrim është konfirmuar edhe nga kryetari i partisë, Bedri Hamza.
“Ne i dimë rezultatet e zgjedhjeve të fundit dhe është përcaktuar partia e parë, e dyta. Ne, si parti politike, e kemi pranuar rezultatin si të tillë dhe kemi qëndrimin në opozitë, siç e ka konfirmuar edhe kryetari i Partisë Demokratike të Kosovës, zoti Bedri Hamza”, deklaroi Lushtaku.
Sipas tij, përgjegjësia kryesore për krijimin e institucioneve i takon Lëvizjes Vetëvendosje si parti e parë, ndërsa kritikoi kryetarin e saj, Albin Kurti, për mënyrën se si po menaxhohet procesi.
“Përgjegjësia kryesore i mbetet Vetëvendosjes, por nga zhvillimet po shihet se Kurti nuk po e merr me seriozitet përgjegjësinë që i takon si parti e parë”, tha ai.
Lushtaku shtoi se zvarritja e procesit politik po e dëmton vendin dhe qytetarët, duke paralajmëruar se mungesa e marrëveshjeve mund të çojë sërish në zgjedhje.
Duke komentuar edhe protestën e qytetarëve para Kuvendit, ai kritikoi mënyrën e miratimit të disa ligjeve, duke thënë se ato nuk kanë kaluar përmes një diskutimi të mjaftueshëm publik dhe institucional.
