Kryetari i Komunës së Skenderaj, Sami Lushtaku, është liruar në procedurë të rregullt pasi u intervistua lidhur me incidentin e ndodhur një ditë më parë në një kafene në këtë qytet.
Pas arrestimit të dy personave të dyshuar, Prokuroria kishte ftuar për intervistim edhe Lushtakun, nën dyshimin për përfshirje në sulmin fizik ndaj zëvendësministrit të Financave, Hysni Mehani.
Para mediave, Lushtaku deklaroi se nuk ka pasur arsye që ai të intervistohej lidhur me këtë rast.
“Njësitë Speciale me armë të gjata vijnë t’a provokojnë qytetarin e këtij vendi që i ka dhënë shumë Kosovës. Në kushte normale, unë nuk duhej të intervistohem fare. Unë e thash edhe më herët që kjo është politikë dhe Albin Kurti dëshiron që, përmes formave që ai ka zgjedhë, që të viktimizohet dhe të përdorë pushtetin për arsyet që ai i di më së miri”, u shpreh Lushtaku.
