Deputeti i Partisë Demokratike e Kosovës (PDK), Mërgim Lushtaku tha se ‘me keqardhje po vëzhgon drejtimin e vendit drejt zgjedhjeve të reja’, duke kritikuar shumicën parlamentare dhe mënyrën se si po menaxhohet procesi i zgjedhjes së Presidentit të Kosovës.
Lushtaku tha se PDK, në krye me Bedri Hamzën, ka tentuar të gjente një zgjidhje konsensuale për situatën politike, por shumica parlamentare nuk ka treguar gatishmëri për kompromis.
“Realisht, ne e kemi parë dhe jemi të gjithë dëshmitarë që Partia Demokratike e Kosovës me në krye Bedri Hamzën, kemi qenë të vullnetshëm që të bëjmë një zgjidhje të situatës aktuale politike që rrjedh edhe me zgjedhjen e Presidentit të Republikës së Kosovës. Dhe kemi qenë pro një kandidati konsensual, por që nuk është arritur ajo figurë që të realizohet edhe të propozohet. Dhe kemi dhënë edhe propozimet tona si Parti Demokratike e Kosovës, dhe fatkeqësisht shohim një lloj arrogance tek pushteti apo tek shumica parlamentare, që është edhe fituese e zgjedhjeve me 51%. Prandaj përgjegjësia kryesore i mbetet Vetëvendosjes duke dhënë ne kontributin tonë në zgjidhjen e kësaj situate. Prandaj me keqardhje po shohim që jemi drejt rrugës së zgjedhjeve të reja, dhe po shohim që më shumë ka qenë i angazhuar zotëri Kurti se si t’ia lërë fajin opozitës sesa t’i zgjidhë problemet reale të qytetarëve që, mirë apo keq, kish ardhur deri te zgjedhja reale apo tek pranimi i kërkesave të qytetarëve dhe punimi drejt zgjedhjeve reale. Ne si parti politike kemi qenë dakord që të japim shanse Kosovës dhe votuesve të 28 dhjetorit të jetesojë platformën pavarësisht pse ne nuk jemi pjesë e qeverisë”, tha ai.
