Deputeti i PDK-së, Mergim Lushtaku ka reaguar pasi Instituti i Mjekësisë Ligjore është përfshirë nga zjarri.
Lushtaku në një postim në Faceboook ka pyetur se kujt është duke i penguar puna e IML-së.
“Kujt po i pengon Instituti i Mjekësisë Ligjore në Prishtinë?”, ka shkruar ai.
Ndryshe, zëvendëskomandanti i Brigadës së Zjarrfikësve të Prishtinës, Abdusamet Shkodra ka bërë të ditur se zjarri në Institutin e Mjekësisë Ligjore (IML) është lokalizuar dhe është nën kontroll.
Shkodra thotë se nuk ka pasur të lënduar, teksa dha detaje rreth rastit, raporton teve1.info
“Sot rreth orës 07:54 minuta Brigada e Zjarrfikësve të Prishtinës ka pranuar një lajm nga stafi i IML-së, se është duke u dhezur objekti. Ekipi i zjarrfikësve menjëherë ka dalë në vendin e ngjarjes, kanë lokalizuar zjarrin. Tani në këto momente është duke vazhduar fikjen e zjarrit. Çdo gjë është në kontroll, nuk ka diçka rrezik. Fatmirësisht nuk ka pasur të lënduar”, deklaroi ai.
Tutje, ai theksoi se sipas informatave që kanë, zyra e djegur është e drejtorit, teksa dëme material kanë qenë dokumente të IML-së.
Në vendin e ngjarjes janë edhe zëvendësministri i Drejtësisë, Blerim Sallahu dhe Nazlie Bala, këshilltarja e ministres së MD-së, Albulena Haxhiu. /Teve1.info/
